Eben is op 26 Augustus 1989 in die destydse Paardekraal Hospitaal in Krugersdorp gebore. Hy is vanaf die ouderdom 3 maande deur sy ouma en oupa bekendgestel aan die wêreld van boeremusiek en word vandag steeds daardeur bekoor.

Na die afsterwe van sy geliefde oupa in 2005 het hy eers begin met genealogie en 'n jaar later besluit hy om 'n konsertina aan te skaf. Sy oom, Louis du Plessis is 'n bekende kitaarspeler in die Krugersdorp-area en het hom adviseer om 'n 40-Klawer Wheatstone aan te skaf. Op 6 Mei 2006 was hy by die Nasionale Boeremusiekdag by die Voortrekker Monument in Pretoria en daar het hy op die spoor van so 'n instrument gekom. Op 13 Mei 2006 is die konsertina by Mnr. Albert Heckler in Môregloed aangekoop. Die oom het nog 'n boerekonsertina gehad wat sy broer, Tiens Vorster, toe later gekoop het.

Oppad huistoe het hy met die eerste liedjie, Stille Nag, Heilige Nag begin en teen die einde van die aand dit vlot gespeel. Kort daarna het hy drie konsertina lesse van Nic Potgieter bestel en heel eerste die Mampoerpolka geleer. Daarna was daar geen keer nie.

Sowat vier maande later het Eben 'n Fender banjo gekoop en binne ses maande weet hy waar sit elke hoofakkoord op die nek. Sy rolmodel op die banjo is Andre Stander.

Aan die begin van 2007 sluit hy aan by die Monnas Boere-orkes van die Hoërskool Monument in Krugersdorp as banjospeler. As deel van hierdie orkes kry hy die geleentheid om bykans die hele land noord van die Oranjerivier te sien.

In September 2007 sluit Eben by die TBK aan nadat hy vroeër daarvan gelees het op Kalie de Jager se webtuiste. Nie lank daarna nie het hy die Leierkitaarspeler van die Monnas Orkes, Dylan Emslie, bygestaan om 'n konsertina aan te skaf en hom met die instrument touwys gemaak. Meer oor Dylan later.

Eben Vorster en Dylan Emslie

In Desember 2007 tydens 'n optrede by die Wesrand TBK saam met sy broer en Dylan ontmoet hulle vir Rejean Viljoen, Martin Dorfling en Henri Jager wat hulle uitnooi om 'n orkes op die been te bring. Dit was die Sonop Boereorkes se eerste Sonopkoms.

Met die Sonop Boereorkes se tweede oefening nooi hulle vir Stephaan van Zyl om te kom raad gee en saam te speel, en 'n hegte vriendskap is gevorm. Nie lank daarna nie koop Eben sy eerste Boer by hom en skryf sy gunstelingnommer, Oom Fritz se Polka, op Bladmusiek.

Tans dra hy sy musiekkennis aan die jonger geslag oor deur die Penkoppe Boereorkes, 'n Laerskoolorkes, af te rig.