Fritz is van Uitenhage in die Oos-Kaap afkomstig en het sy skoolloopbaan in 2007 by HTS Daniël Pienaar voltooi. Hy het in 2005 met een van sy vriende se kitaar kennis gemaak en besluit om self een te koop. Hulle het saam begin leer en so het hy die boeremusiek wêreld betree.

Sy oom, Dick Diedericks, is lid van Theo Slabbert se orkes en sy ouma het vir hulle Daar doer in die Noorsveld, een van hierdie orkes se CDs, gegee. Hy het saam met die CD gesit en kitaar oefen toe die gedagte by hom opkom om die konsertina te probeer. Na ongeveer drie maande het hy uiteindelik 'n Wheatstone konsertina opgespoor en daarvoor betaal met sy verdienste as deeltydse platejoggie vir funksies en partytjies.

Fritz het sedert Maart 2007 gedurende sy vakansietye by Theo Slabbert gaan kuier en hulle het baie goeie vriende geword. Theo het hom aangemoedig en saamgeneem na die Koppiesol Boeremusieknaweek te Vereeniging. As gaskunstenaar saam met Theo Slabbert en die Noorsvelders was hy was maar bewerig om vir die eerste keer voor 'n gehoor op te tree. Nadat hy sewe nommertjies vlot gespeel het was die applous van die bykans vyfhonderd toeskouers genoeg bewys dat sy debuut geslaagd was. Hy het geweet boeremusiek is sy plek is en hier gaan hy bly!

Fritz tydens sy debuut

Eendag het Fritz in 'n tweedehandse winkel rondgesnuffel en nog 'n konsertina opgespoor. Nadat oom Willie van Wyk dit vir hom restoureer het, was die konsertina so goed soos nuut. Hy het dit betyds terug ontvang sodat hy die laaste dag van sy skoolloopbaan voor die hele skool kon optree. Hierdie instrument is ook sy inspirasie vir 11 nuwe komposisies op Japie Laubscher se styl.

Fritz se ma het vir hom 'n banjo uit Saudi-Arabië saamgebring. Ralie van den Heever het vir hom drie basiese drukke geleer en vandaar was daar geen keer nie. Sy ikoon is Hugo Rotter en Fritz het reeds twee komposisies op die Banjo agter sy naam. Hy het in 2008 ook begin trekklavier leer speel en saam met Theo Slabbert sy eerste laserskyf gemaak.

Hy speel tans in Kaapstad waar hy nou op die oomblik leer vir 'n klank ingenieur by die Cape Audio College. Fritz speel by danse en het reeds aan 'n kompetisie deelgeneem en het drie pryse gewen in die tradisioneel opkomende afdeling.

Kopiereg - Séan Minnie 2008